سياسة الخصوصية

البيانات اللي نجمعها

• بيانات الحساب: الإيميل، وكلمة المرور (محفوظة بشكل مشفّر ولا أحد يقدر يقراها)، والاسم، ورقم التلفون (اختياري)، ونوع الحساب (سائق أو ولي أمر/راكب)، والصورة (اختيارية)، ولغة التطبيق.

• للسائق: وصف الباص، والنبذة، والخطوط، واسم المدرسة أو الدوام وموقعه على الخريطة، ورموز الدعوة.

• للسائق المشترك: المدارس والروضات اللي سجل فيها، والمناطق اللي ياخذ منها الركاب.

• الجنس (اختياري): ولد أو بنت للراكب، وسائق أو سائقة للسائق. نستخدمه عشان تطلع النصوص صح، وعشان أولياء الأمور يقدرون يدورون سائقة.

• للراكب: الاسم، ووصف البيت وموقعه على الخريطة، والصورة أو الإيموجي (اختياري). إذا كان الراكب طفل، ولي الأمر هو اللي يضيف بياناته ويوافق عليها.

• الرحلات: متى بدأت الرحلة، ومنو غايب، ومتى انضرب الجرس، ومتى ركب الراكب ووصل. نحتفظ فيها كسجل رحلات.

• الغياب المسجل: الأيام اللي ولي الأمر سجل فيها إن الراكب غايب، أو ذهاب بس، أو عودة بس. يشوفها ولي الأمر وسائق الخط بس.

• موقع الباص: وقت الرحلة بس، تلفون السائق يرسل موقعه عشان أولياء الأمور يتابعون الباص. نحفظ آخر موقع فقط، وينحذف أول ما تخلص الرحلة.

• مسار الرحلة: وقت الرحلة نحفظ نقاط موقع الباص عشان نرسم الطريق اللي مشى فيه الباص بعد ما تخلص الرحلة. نحتفظ بهذي النقاط 90 يوم وبعدين تنحذف.

• الإشعارات: رمز الإشعارات لجهازك، وسجل الإشعارات اللي وصلتك، والإشعارات اللي اخترت تقفلها.

• المحادثات: الرسائل اللي تتبادلها مع السائق (أو مع ولي الأمر أو الراكب لو كنت سائق)، ووقتها، وإذا انقرأت، وإذا حد حظر المحادثة.

• التقييمات: التقييم والتعليق اللي تكتبه لسائق، والبلاغات اللي يرسلها السائق على تقييم.

ليش نستخدمها

• عشان نشغّل الخدمة: الخطوط، والرحلات، ومتابعة الباص، والإشعارات، وسجل الرحلات.

• عشان نرتب أفضل طريق للسائق ونحسب متى الباص قريب من البيت.

• عشان نحمي المستخدمين، ونراجع البلاغات، ونمنع إساءة الاستخدام.

• عشان نتواصل معك بخصوص حسابك أو اشتراكك.

ما نبيع بياناتك، وما نستخدمها للإعلانات، وما فيه أدوات تتبع إعلانية في التطبيق.

منو يشوف بياناتك

• السائق يشوف بيانات الركاب في خطوطه: الاسم، والصورة، ووصف البيت وموقعه، واسم ولي الأمر، وسجل رحلاتهم معه. ويشوف رقم ولي الأمر بس طول ما الراكب مسجل في خط شغال عنده.

• ولي الأمر أو الموظف يشوف بيانات سائقه: الاسم، والصورة، ووصف الباص، والتقييم. ورقم السائق يطلع بس للي عندهم راكب مسجل في أحد خطوطه الشغالة. وموقع الباص يطلع وقت الرحلة بس.

• الرسائل يشوفها بس الشخصين اللي في المحادثة. أي أحد يقدر يراسل السائق من صفحته، والسائق يراسل بس أولياء الأمور والركاب اللي في خطوطه، أو يرد على اللي راسله. وكل واحد يقدر يحظر المحادثة.

• السائق المشترك اللي يسجل في المدارس يطلع لكل مستخدمي التطبيق في صفحة المدرسة: اسمه، وصورته، ووصف الباص، والنبذة، والتقييم، والمناطق اللي يخدمها. رقمه ما يطلع، ويقدرون يراسلونه من التطبيق.

• التقييمات تظهر بدون اسم. لا السائق ولا غيره يقدر يعرف منو كتب التقييم.

• فريق مسار يشوف البلاغات على التقييمات عشان يقرر فيها.

شركات النقل

بعض الخطوط تديرها شركة نقل متفقة مع مسار. الشركة تضيف سواقها، وتملك الخطوط، وتقدر تغيّر السائق على الخط.

• قبل ما تنضم لخط تابع لشركة، التطبيق يبلغك باسم الشركة وإنها بتشوف بيانات الراكب، وتقدر تختار ما تنضم.

• الشركة تشوف، للخطوط اللي تديرها بس: اسم ولي الأمر ورقم تلفونه، واسم الراكب وجنسه ووصف البيت وموقعه على الخريطة، والغياب المسجل، وحالات الركوب اليومية وأوقاتها (متى ركب ومتى نزل)، وكم انتظر الباص عند الباب، وصورة مسار كل رحلة.

• صورة المسار: الشركة تشوف الطريق كامل. وولي الأمر يشوف بس خط الباص وبيته هو، وما يشوف بيوت الركاب الثانيين.

• الشركة هي اللي تقرر شلون تستخدم هذي البيانات لخطوطها، وهي المسؤولة عنها قدام القانون، ولازم تستخدمها بس لتنظيم النقل وسلامة الركاب. مسار يوفر الأداة ويحفظ البيانات لها.

• لأي طلب عن بياناتك في خط تابع لشركة، تقدر تتواصل مع الشركة مباشرة أو معنا على support@masarapp.net.

الشركات اللي تساعدنا

نستخدم مزودي خدمات موثوقين يعالجون البيانات نيابة عنا وبس للغرض المطلوب:

• Supabase: قاعدة البيانات، وتسجيل الدخول، وحفظ الصور، وإرسال رموز الدخول بالإيميل.

• Expo و Apple و Google: توصيل الإشعارات للتلفون (إشعار الرسالة فيه اسم المرسل وأول الرسالة).

• Apple و Google: عرض الخرائط داخل التطبيق.

• Google Maps Platform: لما السائق يضغط "رتّب الطريق"، نرسل موقعه ومواقع البيوت والمدرسة لـ Google عشان يحسب أفضل ترتيب.

• Resend: إرسال إيميل لفريق مسار لما يوصل بلاغ على تقييم.

بعض هذي الخوادم ممكن تكون خارج البحرين، ونتأكد إنها تحمي البيانات بمستوى مناسب.

حماية البيانات

البيانات تنتقل مشفّرة. كل مستخدم يقدر يوصل لبياناته وللبيانات المسموح له فيها بس، وهذا مضبوط في قاعدة البيانات نفسها. الصور محفوظة في مكان خاص وتنعرض بروابط مؤقتة.

مدة الحفظ

نحتفظ ببياناتك طول ما حسابك موجود. لما الراكب أو الخط يتوقف، نشيل موقع البيت والصورة ونخلي الاسم في سجل الرحلات بس. إذا طلبت حذف حسابك، نحذف بياناتك خلال 30 يوم، إلا اللي يلزمنا القانون نحتفظ فيه.

حقوقك

تقدر تطلب نسخة من بياناتك، أو تصححها، أو تحذفها، أو تعترض على استخدامها. أغلب البيانات تقدر تعدلها بنفسك من التطبيق، وتقدر تقفل أي نوع من الإشعارات من الإعدادات. لأي طلب ثاني راسلنا على support@masarapp.net. ومن حقك تقدم شكوى لهيئة حماية البيانات الشخصية في البحرين.

الأطفال

الأطفال ما يسوون حسابات. ولي الأمر هو اللي يسجل ويضيف بيانات ولده، ويقدر يعدلها أو يحذفها في أي وقت.

التغييرات وتواصل معنا

إذا غيرنا هذي السياسة بنبلغك في التطبيق، وبنطلب موافقتك على النسخة الجديدة. لأي سؤال: support@masarapp.net.